Saturday, August 16, 2014

Something in Urdu



Aye aab-e-rood-e-ganga kya toone us waqt ko faramosh kar diya jab khuda shanason, ahl-e-ilm aur ahl-e-dil ke karvan tere kinare utre aur is sarzameen ki fazaoon mein deen-e-haq ki pardah kushayee ki? Haq ki sada se methee kaun si sada ho sakti hai? Malik aur Khaliq ke kalaam se behtar kaun see guftgoo ho sakti hai? Us Rahman-o-Raheem ke parastaron ke sath phir ye berukhi kyun? Unse itni adawat kyun? Kya apne dil-o-jigar ko tatol kar nahin dekha ki Muhammed (SAW) ke shaidayee tumhari us amanat ko baghair kisi tarmeem ke tum tak le aaye? Hamari kavish ka gar koyee pas nahin to na sahi magar apni is amanat se is qadar bezari kyun? Qasam hai us zaat ki jis ke qbze mein hamari janein hain humein apni is sayee ki tumse koyee ujrat nahi chahiye magar khudara is saugat ko sanbhalo jis se qeemti koi shai parvardigar ne nahi banayee. Badi door se aye huway logon ka ye tohfa muhabbat ka tohfa hai. Aur agar phir bhi tumhein is se inkar hai to phir humein apni zimmedari se farigh kar dijiye. Hum apni auqat ke mutabiq khair khwah hain aur apne eeman ke mutabiq mukhlis. Is khudayee eenam ko thukrana bade khasare ki baat hai.